Служба сщмч. Серафиму (Чичагову)

Служба сщмч. Серафиму (Чичагову)

Память 28 ноября(11 декабря)

 


На Велицей Вечерни

По пред­на­чи­на́­тель­ном псал­ме́, Бла­же́н муж: 1-й ан­ти­фо́н.

На Го́с­по­ди воз­зва́х: сти­хи́­ры свя­щен­но­му́­че­ни­ку - 8, глас 2.
по­до́­бен: «Егда́ от Дре́­ва»:

Егда благоволением, святе, Божиим/ Служение Царю и отечеству свершал еси доблественне,/ Добропобедных о наследниче предков-воинов,/ Яко лев по имени и храбрством явился еси,/ Супостатом страх, верным же образ,/ Како души не щадети за искренния,/ Сего ради на грядущия о Дусе подвиги/ Соблюде тя Небесный Царь Иисус -// Бог полков серафимских.

 Егда благословением Кронштадтскаго пастыря/ Зван был еси на служение священное,/ Зрел еси, честне, в сем мученичество волею,/ Но обаче верою трепетною,/ Паче же любовию сердца мужественна/ Вдался еси, яко железо ковачу, -/ Промышлению, мудре, Божественну,/ Имже устрои тя ко званию высшему Иисус -// Бог избранных на крестоношение.

 Егда, испытуя в горниле скорби/ Злато благородныя души твоея,/ Призва к Себе возлюбленную ти супругу Господь,/ Ты, навык от юности Тому прекланяти главу,/ Паче же лобызати десницу Божественную,/ Попечению благому вверив сироты,/ Ангельский избираеши, о Серафиме, образ,/ Да усвоит ти молитву, яко царицу добродетелей, Иисус -// Бог лицезримый сердцу чистому.

Егда летописание ти Серафимовы обители,/ Чудне отче, свыше вверися,/ Ты счастливою сердца памятию,/ Во едино собирал еси свидетельства истинныя,/ Яже о Божиих чудесех и подвизех иноческих,/ Любовию пламенея ко преподобному,/ Иже и посещением дивным презельне возрадова тя,/ Да и паки прославлению того послужиши,/ Волею царя, любочестна о святых,/ Да конечне возславит преподобный Серафим/ Сию двоицу новую от священства и царства,/ В пренебесных обителех, идеже славится вечне Иисус -// Единый от человеколюбныя Троицы.

Егда преукрашением обителей, о Серафиме,/ Паче же тщанием о славе преподобнаго,/ Просветися свет твой пред человеки,/ Тогда к высочайшему Господь призывает тя подвигу,/ Еже пасти Церковь Божию в преподобии и правде, -/ Непостижный убо разуму, но ощутительный верою -/ Живожертвенне крест приемлеши епископства:/ Имже вознесе тя вышенебесный архиерей Иисус -// Бог подвизающихся о любви и истине.

Егда среде лукаваго смятением времене/ Новое ти служение свершал еси, о Серафиме,/ Во Иверии древней, Орле, Бессарабии и славней Твери-/ Радость верным, мятущимся укрепление,/ Слово огненное бысть и житие ти безпорочное:/ Отступником же угли разжженныя на главу,-/ Да не мыслят лестию о христианстве без Христа/ И о человеколюбии без Божия имене, -/ Во единей убо руце, отче, держа честный крест,/ Другою же бия во святый проповедания набат:/ Сице спасал еси всяко некия -/ Сице бо учи апостолом тя Иисус-// Бог крепкодушных состраданием.

  Егда попущением Божиим,/ Восхитиша власть на Руси зверонравнии,/ Се презельныя скорби постигоша тя, отче:/ Се разлучение с паствою, клеветы, судища беззаконныя,/ Се изгнания в отдаленныя веси,/ Се болезни, заточения в темницех, от лжебратии ненавидение,-/ Усмотряя убо велие терпение твое,/ На престол священный Петрова града возносит тя Иисус -// Бог прескорбных и изгнанных.

 

Егда, о врачу Серафиме мудре,/ Разделение Церкве горькое заживлял еси,/ Непрестанно зовя ко Источнику Безсмертия,/ К единению о распятом и воскресшем Христе, -/ Се, сугубую безбожных ярость навлекая на ся,/ Истощал еси преизлишше телесныя силы, о Божий старче ,/ Сего ради во устроение конечное дома души/ Дарова последний тишайший ти удел Иисус -// Бог смирением совершенных.

 Слава, глас и подобен тойже:

 Егда пресыщенна летами тя, преболезненна, преистязанна,/ Повлекоша на конечное судилище безчеловечнии, -/ Серафимом пачеестественное терпение твое предивно бысть,/ Яко и мужество велие при устрелянии еже в Бутове,/ Да исполнится славою небошественный ти, отче, подвиг,/ Да прошение твое к тезоименну преподобному -/ Еже со оным приснопребывания -/ Любочестне исполнит возлюбленный вам Иисус,-// Страждущих о любви и истине Бог.

 И ныне, глас 6: Вертепе, благоукрасися…

 Прокимен дне и чтения 3

Притчей чтение.

Память праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея, в шуйце же ея богатство и слава. От уст ея исходит правда, закон же и милость на языце носит. Послушайте убо мене, о чада, честная бо реку, и блажен человек, иже пути моя сохранит. Исходи бо мои – исходи живота, и уготовляется хотение от Господа. Сего ради молю вас и предлагаю мой глас сыновом человеческим: яко аз, премудрость, устроих совет, и разум и смысл аз призвах. Мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо, незлобивии, коварство, ненаказаннии же, прилагайте сердца. Послушайте мене и паки, честная бо реку, и отверзу от устен правая, яко истине поучится гортань мой, мерзки же предо мною устны лживыя. С правдою вси глаголы уст моих, ничтоже в них стропотно, ниже развращенно. Вся права суть разумевающим и проста обретающим разум. Научу бо вас истине, да будет о Господе надежда ваша, и исполнитеся Духа.

Премудрости Соломони чтение.

Праведник, аще постигнет скончатися, в покои будет. Осудит же праведник умираяй живущия нечестивыя. Узрят бо кончину праведнаго и не разумеют, что совещаша о нем, яко повержет Господь нечестивыя безгласны ниц и поколеблет их от оснований, и до последняго исчезнут в болезни, и память их погибнет. Приидут бо в помышление согрешений своих ужасни, и обличит их сопротив беззакония их. Тогда станет в дерзновении мнозе праведник пред лицем оскорбивших его и отметающих труды его. Видевше же его, смятутся страхом многим и ужаснутся о преславнем спасении его. Рекут бо в себе, кающеся, и в тесноте духа воздохнут и рекут: сей бе, егоже имехом некогда в посмех и в притчу поношения, безумнии, житие его вменихом неистово и кончину его безчестну. Како вменися в сынех Божиих, и во святых жребий его есть? Убо заблудихом от пути истиннаго, и правды свет не облиста нам, и солнце не возсия нам. Беззаконных исполнихомся стезь и погибели, и ходихом стези непроходны, пути же Господня не разумехом.

Премудрости Соломони чтение.

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим, аще и муку приимут, упование их безсмертия исполнено. И в мале наказани бывше, великими благодетельствовани будут: яко Бог искуси я, и обрете их достойны Себе. Яко злато в горниле искуси их: и яко всеплодие жертвенное прият я. И во время посещения их возсияют, и яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему. Яко благодать и милость в преподобных Его, и посещение во избранных Его.

  Стихиры на литии, глас 6, подобен «Всю отложивше»:

 Отче долготерпеливе Серафиме,/ Возводиму ти на епископство,/ Слово рекл еси вдохновенное/ О презельных скорбех, богопосланных ти,/ Сироте от осми лет, удрученну людским бездушием,/ В юности вкусившу войну, браней ужасы,/ Потрясением в житии некончаемым,/ Увенчанным вдовством безвременным,/ Тяготу сию приемлет убо о Господе// Сердце ти благостно, благообразна душа.

Серафиму святому слуго, дивный трудниче,/ Кто поведает миру треволнения ти,/ Имиже сердце преисполнь терзалося,/ Имиже дух о Церкви земной болезновал,/ Яко мир, побежденный верою,/ В Божий дом, во ограду святую неприметно проникл есть,/ Яко пламенней святости преподобнаго/ Не ценят, не славят, не сильны вместити,/ Но сия поверяет чудотворящему Богови// Сердце ти верное, адамантова душа.

Непокорен сый миру, послушлив Господеви,/ Что от слуг ядоносных того не приял еси, отче святый,/ Се злословия, речи лукавыя,/ Се презорство, се молчалива вражда,/ Се отступства, Церкве ненавидение,/ И от присных по духу непонимание горькое:/ Вся на тя ополчишася, отче святый,/ Но терпит, миром Христовым исполнено,// Сердце сокрушенно, великая душа.

Лихолетию лютому зачинающуся,/ Изгоняему, отче, ти от лжебратии из Твери,/ Удержану, не пущену к пастве во уделы Польския,/ Истязуему, многажды в темницы заточаему,/ До Архангельских рек досылаему, до Марийских лесов,/ Телу старческу ти, преболезненну,/ Но никакоже изнемогает смущением// Сердце светло, крестоносна душа.

 И сия, на глас 7:

 Ужас бе видети/ Страстотерпца, болезнь изведавша,/ Не имуща доброты видения,/ Телеси, преисполненну ранами,/ Очесем, обжигающим мукою,/ Ушесам, от хулений незамкнутым,/ Гортани, иссохшей жаждею,/ Сердцу ж дышущу огненною верою,/ Яко сице, в безмерней немощи,// Совершается сила Божия.

 Слава, глас тойже:

 Вне родных домов заключаются исповедницы,/ Вне темниц безвестием томятся сродницы,/ За Христа Изгнанника волею,/ Кто испишет сие, токмо опытне:/ Вне града изводятся мученицы на смерть,/ Поношение нося Агнца Божия,/ Вне врат пострадати изволившу:// Доколе, Владыко Святый и Истинный?!

И ныне, глас тойже:

Разверзающуся на Руси лихолетию,/ Плачем вдов и сирот преисполнену,/ Тьмами сирот, вдовиц горьким тысящам/ Неутешней земли приложилося,/ Убиенным страдальцем в Бутове/ Ихже старей бе Серафим преиспытанный,/ Духом, подвигом, саном, леты зрелостию,/ В небе ж русском звезды неизчетныя/ Возсияша нам в просвещение/ Да любовию поем Вышней Троице:/ Свят, Свят, Свят еси, Боже праведне -// Богородицею помилуй нас.

Стихиры на стиховне, глас 2, подобен «Доме Евфрафов»:

 Земле Русская,/ Подвиги в веках прославленная/ Воинов несокрушимых доблестию,-/ Слави тех святонаследника -// Серафима - стратига мучеников

Аз же яко маслина плодовита в дому Божии,/ уповах на милость Божию во век и в век века:

Церковь Русская,/ Кораблю Боговодимый,/ Доле среде бурь тлетворных/ Цельбоносна призови с небес кормчаго -/ Серафима-священнолекаря и мученика.

 Исповемся Тебе во век, яко сотворил еси, и терплю имя Твое,/ яко благо пред преподобными Твоими:

 Соборе святых русских,/ Преисполнь дарми Божественными,/ Велелепнаго витию-ритора,/ Живописца и певца изряднаго - // Серафима увенчай священномученика

 Слава:

 Бутово врата небесныя/ Страшнодивновеликия/ Кровми праведник священныя/ Отверзай божественныя входы верным// Дерзновением Серафима священномученика

И ныне:

Богородичен Доме - Русь,

В сени си святособравшая/ Агапита и Алипия/ С воином Феодором, с Филаретом мудрым,-// Серафима тем воспой священнотаинника.

Ин Богородичен:

Новый доме Евфрафов,/ Светоносный столпе Бутово,/ От глубин земных до небес сияяй,/ Возблистай священною памятию// Серафима солнца Руси новаго.

Тропарь, глас 4:

 Яко единонравен учителем вселенныя,/ яко светоч Руси, преисполнен дивных даров,/ преподобных возлюбленне и праведных,/ яко веры исповедник явился еси,/ злобу мира отразивый доблественне,/ - Серафиме стратиже мучеников,// моли о душах наших.

НА УТ­РЕ­НИ

На Бог Гос­по́дь: тро­па́рь свя­та́­го два́­ж­ды. Сла́­ва и ны́­не: Богородичен гласа.

По 1-й сти­хо­ло́­гии се­да́­лен, глас 2:

Иллариону священномученику ризу свою светлейшую погребения ради трепетом и любовию даровал еси, Серафиме, ныне же, о страдальцы-пастырие, Агнцу предстоите в Кровию Его убеленных ризах, паче солнца на небеси блистающих.

 Слава и ныне:

В ризах позлащенных одеяна и преукрашенна, предста одесную Тебе, Царю, Державная Владычица, о Руси Святей умоляющи с новомученики.

 По 2-й сти­хо­ло́­гии се­да́­лен, глас 6:

Небезызвестны быша ти, Серафиме отче, горе и нужды клира и паствы, егда крест епископства на рамо возлагал еси, ихже и утолял еси состраданием жертвенным, наши убо ныне беды, святе, снисхождением облегчи.

Слава и ныне:

 Веси, Владычице , беды и нужды людей Твоих, Матерним убо заступлением утеши рабы Твоя.

  По полиелее:

 Страшен пагубы служителем и на одре болезни был еси, старче Божий, мнившим тя, героя великаго сокрушити духа. Где ти, аде, победа, - восклицаеши, Серафиме со Исаиею ныне и Златоустым: Воскресе Христос и с Ним новомученицы.

 Слава:

 Тело немощствует крайностию, адамантова воздыхает смирением душа, бодрствует зверонравным неприкосновен дух Серафима-старца, мучеников богоизбранна вождя, велия ныне Руси заступника.

 И ныне:

Внутри Тебе Самой, богомудрствует священномученик Серафим, осталася слава Твоя, Богомати, на земли, всем же неприкосновенною соделася - и Сыну Твоему Божественному, сего ради язык наш, поющ Тебе, умолкает.

 Прокимен, глас 4:

Тебе ради, Господи, умерщвляеми есмы весь день.  Стих: Вменихомся якоже овцы заколения.

 Евангелие от Иоанна, зачало 36

 Стихира по Евангелии, глас 6:

 Святым иже суть на Руси святей,/ новомучеником преславным,/ удиви Господь хотение Свое,/ еже Церковь Русскую возродити/ дерзновенным сих ходатайством,/ сего ради Серафиму, велию стратигу сих,/ подвигом пламенным прославлену,/ паки и о всей Руси умоляющу, возопиим:// радуйся солнце новое земли Русския!

  Канон, глас 4

 Краегранесие: Не остави бедствующия, на борющия укрепи, отче наш Серафиме

 Песнь 1

 Ирмос: Моря чермную пучину невлажными стопами древний пешешествовав Израиль, крестобразныма Моисеовыма рукама Амаликову силу в пустыни победил есть.

 Святый священномучениче Серафиме, моли Бога о нас:

 Не остави суетою отягченнаго мя, слово воспети тя ниспосли, ко вниманию вышнему, отче Серафиме, настави.

 Святый священномучениче Серафиме, моли Бога о нас:

 Еже в славнем семействе воинстем рождество твое, еже со преподобными и святыми пастыри твое житие, с мучениками же память твоя, Серафиме.

 Святый священномучениче Серафиме, моли Бога о нас:

 Отечеству и Царю служение, яко добра рода крест на рамо приемлеши, да озарится земля Болгарская и твоим подвигом - русскаго доблестию воина.

 Святый священномучениче Серафиме, моли Бога о нас:

 Супругу дивноблагородную избираеши Наталию, яко истинный рачитель семьи являешися, сия малыя церкве, по Златоустому.

 Слава: Талант врачебный вверяет трудолюбию твоему, святче, Господь, да, верою утверждаяся, еже человеку на благо изыщеши в творении, премудре, Божием.

 И ныне: Аннина яже от неплодства Дщерь чревоносит ныне Безсеменно Рождество, - взыграйте, людие, песнопоюще.

 Катавасия: Христос раждается:

 Песнь 3

 Ирмос: Лук сильных изнеможе, и немощствующии препоясашася силою, сего ради утвердися в Господе сердце мое.

 Святый священномучениче Серафиме, моли Бога о нас:

Вся мирская, аще и пред человеки достойна суть, яко суету вменяеши, пастырю послушлив Кронштадтскому, присным тому являеши ся - по духу любве пастырския.

 Святый священномучениче Серафиме, моли Бога о нас:

 Иже нас ради распныйся, се и тя к сораспятию зовет, крест вдовства на рамена ти возлагает, яко вся ведый - и терпение и любовь твою.

 Святый священномучениче Серафиме, моли Бога о нас:

Божия ти объятия отверзаются, мира отрекшуся доброму пастырю, имя и житие восприемлющу серафимския.

 Святый священномучениче Серафиме, моли Бога о нас:

Еже по образу Христову взывая: "Мне подобает делати дела Пославшаго мя", - се прославляеши Тем прославленныя, летописуя о вверенных ти, Серафиме, обителех, о Зосимовей пустыни и лавре Евфимиевей, се обновлением духа тыя возсозидаеши.

Слава: Дивится небо, радуется же земля о Дивеевстей летописи, обручающей ти сугубое дерзновение к преподобному, иже и небесный предуготовляет венец серафимовей по святым любви твоей.

И ныне: Слава Твоя, Мариам, по Давиду, внутрь вся есть, се бо утвердися в Господе сердце Твое.

Седален, глас 2:

 Послушания святаго, отче, правило, ни шага стопы не дерзал еси вне благословения Иоаннова, предстани убо за ны, сего печальника о наследниче, архипастырю милостиве Серафиме.

 Слава и ныне, глас 2:

 Послушание исполнити убо Евино, се Дева приблизися в Вифлеем, да новому явится Адаму помощницей, да спасение печалованием Тоя улучим.

 Песнь 4

 Ирмос: Вознесена Тя видевше Церковь на Кресте Солнце праведное, ста в чине своем, достойно взывающе: слава силе Твоей, Господи.

Святый священномучениче Серафиме, моли Бога о нас:

 Труд одинокий подъемлеши, отче, да прославится на земли велий заступник Руси Серафим, - труд сладостный ради зримаго того покрова, скорбный же, увы, ради хладного сильных мира нечувствия серафическия того святости.

Святый священномучениче Серафиме, моли Бога о нас:

 Весь, отче, вдался еси подвигу, иже ти изволением царским вверися, во еже преподобнаго Серафима прославити, во еже святостию того жития и молитвою - людие просветятся, утвердится вера, воспламенится ко Христу любовь.

 Святый священномучениче Серафиме, моли Бога о нас:

 «Ум, совлеченный земнаго, имети, и, елико возможно немощи человечестей, единым быти со Христом,» - се правило Серафима преподобнаго, се и ти, отче, небесный в житии восход.

 Святый священномучениче Серафиме, моли Бога о нас:

Юже зрел еси любовь, в преподобном предивную, о сей миру свидетельствуеши, Серафиме, о сем ангеле на земли, о человеце небеснем, иже исполни, явивыйтися, сердца ти мольбу пламенную – се, во веки с ним пребываеши, мучениче.

 Слава: Щадети себе самаго не мыслил еси, отче святый, лобызая прежния и предзря будущия скорби от мира, паче же от Господа Подвигоположника, милостию и правдою на епископство тя возводяща.

 И ныне: Иже от простых и премудрых, вся верныя собираеши, Дево, в Вифлеем пети Тя, Сыну же Богокрасному звати: слава силе Твоей, Господи!

 Песнь 5

 Ирмос: Ты, Господи мой, Свет в мир пришел еси, Свет святый, обращаяй из мрачна неведения верою воспевающия Тя.

 Святый священномучениче Серафиме, моли Бога о нас:

 Яко от небесных доброт лицезрения открывается ти, отче, живописания дар, во свидетельство о Христе - Свете и Лепоте и Жизни истинней.

 Святый священномучениче Серафиме, моли Бога о нас:

 Не умолкал еси, отче, сладкий твой глас, песнопоя людем о святей любви Христовей, в нейже сомнения несть, яко ради ея живем и движемся и есмы.

Святый священномучениче Серафиме, моли Бога о нас:

 Апостольску ученику подобяся, о словесном даре, дивно в тебе умножившуся, не небрегл еси, Серафиме мудре, - и нашу худость снисхождением восприими в верное ти ученичество.

 Святый священномучениче Серафиме, моли Бога о нас:

 Благодать Божия непрестанно борется за людей, к покаянию возбуждая, - сице взывал еси, Серафиме отче, - в сем подвизе и пребывал еси житием, иже во Христе.

 Слава: О даров пребогатых, имиже осени тя благодать Божественная, отче! О труда твоего неусыпнаго! О духовных плодов новаго Дамаскина русскаго!

И ныне: Разрешити Адамову клятву, слезы утолити Евины грядеши, Чистая, в Вифлеем, немотство же греха уставити славословящих Человеколюбца.

 Песнь 6

 Ирмос: Пожру Ти со гласом хваления, Господи, Церковь вопиет Ти, от бесовския крове очищшися ради милости от ребр Твоих истекшею кровию.

 Святый священномучениче Серафиме, моли Бога о нас:

 Юже предзрел еси скорбь, древний приим Кананита жребий, та и срете ядом тя клеветы, паки же ненавидением злых, горьким изгнанием печатлея зачало новаго ти, Серафиме, подвига.

Святый священномучениче Серафиме, моли Бога о нас:

 Щедростию души пречуткия, отче, заступал еси невинныя, враждующия умиряя, горькою разделенных смутою к покаянию воздвизал еси жертвенным образом, еже во Орле и Бессарабии служения твоего.

 Святый священномучениче Серафиме, моли Бога о нас:

 И в первые лета пути архипастырска зрел еси, Серафиме, велию скорбь грядущую, яко дел не отвергаем тьмы, по завету апостола, и во оружие света не облекаемся.

 Святый священномучениче Серафиме, моли Бога о нас:

 Яко зрел, совершенен плод благодати Божественныя и вседенных ти, отче, трудов явился еси в благославней Твери, единением в дусе возжигая веру пастырей, с нимиже и паствы.

 Слава: Устрояеши приходскую жизнь, о неленостне трудниче, взывая в оныя лихия и на вся грядущия времена: несть Руси воскресения без духовных пастырей.

 И ныне: Камо идеши, Чистая? Чесо ради течение совершаеши? Сына родити Превечна гряду в Вифлеем, да клятвы избавит Адама с праматерию.

  Кондак, глас 2:

 Твердаго и боговещаннаго исповедника веры, жизни церковныя мудраго устроителя, преподобным Серафимом возхваленнаго, архиерея преиспытанна и пламенна мученика, славу Руси Серафима новаго, вернии, любовию похвалим вси.

 Икос:

Златоустовою возпламенившись ревностию, паки Григориево тайнозрение явль, о духом велие Серафиме, Василиеву твердость управлением церковным наследуя, Серафима преподобнаго воздыхание о Руси притяжал еси, паки и пастырю Кронштадтскому горением непрестанным духа уподобился еси, предивне отче. Над всем же сим мученический ти сияет венец. Слово изнемогает, но любовию дух зовет:славнаго Серафима да похвалим вси.

 Песнь 7

 Ирмос: В пещи авраамстии отроцы персидстей любовию благочестия паче, нежели пламенем опаляеми взываху: благословен еси в храме славы Твоея, Господи.

 Святый священномучениче Серафиме, моли Бога о нас:

 Руси, смутою пораженною, се гонения прелютыя на Церковь воздвизаются, се и старец-архиерей от пределов своих изгнан - из Твери первее, из Варшавы пресмутныя, даже до града Архангелова многоболезненный досязает Серафим.

 Святый священномучениче Серафиме, моли Бога о нас:

 Егда, исповедниче и святителю, заточении истязуем, паки и сосыланием удручен, вся терпети конечне уготовился еси, Серафиме, но се, заступлением Патриарха-исповедника во своя возвращаешися.

 Святый священномучениче Серафиме, моли Бога о нас:

 Приемлет в богодарованную тя, Серафиме, обитель добронравная игумения, яко старца-молитвенника, яко светоча Церкве дивнаго, спосылая на крестный ти путь инокини-исповедницы.

Святый священномучениче Серафиме, моли Бога о нас:

 И врач разделением горьким, и неусыпный в молитве страж о людех смятенных являеши ся, на престол сроднаго ти града Петрова призван, Серафиме, паки и честь погребальную воздаеши присному духом ти Соловецкому узнику.

 Слава: Обдержим болезньми, труды непомерными отягчен, се в тихую гавань управляеши корабль души, Серафиме, да к закату багряному пламенна ти жития уготовишися.

 И ныне: Ты и надежда наша, Мати и Дево, Ты и честь земнородных, се Тобою дерзаем и Тобою хвалимся.

 Песнь 8

 Ирмос: На Кресте плотию пригвожденнаго и показавшаго нам оружие во спасение, отроцы, превозносите Христа Бога нашего во веки.

 Святый священномучениче Серафиме, моли Бога о нас:

 Что истязания ваша ми болезнями преистязанну, емшим его беззаконным Серафим вопиет, что суды ваша имущу на суд отъити - к осужденну мя ради Христу, неумытну Отцу, очищающу Духу.

Святый священномучениче Серафиме, моли Бога о нас:

 Еже жити Христос ти бысть, еже умрети - яве Отча благоволения приобретение во веки, се луною в нощи осиявает тя нареченная смерть - упованием, Серафиме, Духа.

Святый священномучениче Серафиме, моли Бога о нас:

 Ныне раба Твоего отпущаеши, воздыхает тихостию Серафим Христу, устреляем лютостию, укрепляем благостию Отца - осенением Духа.

 Святый священномучениче Серафиме, моли Бога о нас:

 Ангелы предсретают тя, Серафиме, отверзаются, святе, Отча объятия в небесех, Сына ти благодать и причастие во веки Духа.

 Благословим: Шелестом листвий постени, Бутова о премирный саде, над безвестным гробом ти предстоятеля - боль земли прегорчайшую изцели - утешением Духа.

И ныне: Се раба Господня, - рекла еси ко Архангелу, Чистая, - и мене сим смирением просвети - снисхождением Духа.

 Песнь 9

 Ирмос: Сотвори державу мыслию Своею низложи бо сильныя со престоли вознесе смиренныя Бог Израилев. В нихже посети нас Восток с высоты и направил ны есть на путь мира.

 Святый священномучениче Серафиме, моли Бога о нас:

 Егда внуцы святых о священной тех озаботятся памяти, егда новаго Иоанна-старца исполнят благословение, се и нам от небесныя, отче, трапезы крупицы оставятся, се труды твоя необозримыя знаеми днесь, се молитвы твоя воздвизают ны.

 Святый священномучениче Серафиме, моли Бога о нас:

 Радуются воины, Серафиме, верныя, с нимиже и лекари, отче, и певцы Божественныя с живописцы, зовуще ти: ты наша похвала, святе, и укрепление.

 Святый священномучениче Серафиме, моли Бога о нас:

 Архиерей подобаше таков, иже малодушныя утешит, заступит немощныя, безчинныя же вразумит, и о всех долготерпелив явлься, душу положит о Христе, образ предпоказуя нам человеколюбнаго снизхождения.

 Святый священномучениче Серафиме, моли Бога о нас:

 Филаретова слова наследника, Серафимова же тезоименна певца,

Игнатиево стяжавша трезвение и Феофанову мудрость, свято-Бутовскаго предстоятеля, Иоанна великаго благословение убо воспоем вси.

 Святый священномучениче Серафиме, моли Бога о нас:

 Иже подвиг воспев преподобнаго, таже онаго похвалу, Серафиме, стяжав, любовию немощным обычною снисходяй, прости словес убожество, не довлеют бо и вмале сии превелией твоей святости.

 Слава: Многочастне и многообразне Бог, дивный во святых Своих, тя прославляет, Серафиме, и мы Тому серафимскую песнь вопием: Свят еси и пресвят, новомученик молитвами помилуй нас.

И ныне: Егда славнии новомученицы воздохнут о нас Богородице, уповаем Тою спасение улучити и возопити Благословенней: Яже о всех благая Мати, слава Тебе.

 Светилен, подобен «Посетил ны есть»:

 Просветил тя есть/ миру Светом нарекийся,/ да истинно светоявиши, Серафиме огненне,/ любовь Того пресветлую/ - и кистию благословенною,/ и ясным житием,//и светозарным мученичеством.

 Слава и ныне: Света превечна приятелище,/ Дево Мати Господня,/ просвети рабы Твоя.

  На хвалитех стихиры, глас 8, подобен «О преславнаго чудесе»:

 Отче Серафиме благообразне,/ Еще прежде ти обета иноческа/ Явися присным образ яко ангельский твой:/ Се привлекл еси своих си шествовати по Христе,/ Се бо дщери ти и внука следуют о Господе твоим стопам,/ Се и именем трие нарицаются единым серафимским,/ Да явишися, чудне отче, похвалою и надеждею тем,/ Да умолиши Христа о сродных ти по плоти и духу,/ Да во веки возгласят любочестну песнь о тебе:// Сей от рода нашего есть.

В славней, Серафиме отче, памяти твоей,/ Единятся две столицы русския:/ Чтит Петра верховнаго сугубо тя град,/ Рождество хваля и архипастырство,/ Чтит первопрестольная излишше/ Ради первых подвигов священнических,/ Наипаче же о страдании в Бутове,/ Единятся убо зде и тамо/ Новодевичии ти присныя обители,/ Внукою игуменией взывая о тебе:// Сей от рода нашего есть.

Собираеши пречудне Серафиме,/ В торжество твое сиятельное/ Живописцы, воины, врачи,/ С нимиже истории любители,/ Со певцами таже песнописцами,/ Чтущих верно тя молитвенника сим,/ Яко истинно вознесша до небес/ Тех о Господе служение высокое,/ Возсылающих ти ныне хвальное согласие:// Сей от рода нашего есть.

Человече Божий Серафиме,/ Се в любезней сердцу памяти твоей/ Радуются слова рачителие,/ И монахов свеселится множество,/ С нимиже сословие играет священное,/ Вси же нуждею терпящии утешаются,/ О внимании ти, златословесну витии,/ Ведая молитвы тиха тя делателя,/ Пастыря изряднаго о мудрости,/ Необорима же терпением мученика,/ Всем бо образ был еси и правило,/ Упование не посрами убо хвалящих тя:// Сей от христозваннаго рода нашего есть.

 Стих: Исповемся Тебе во век, яко сотворил еси, и терплю имя Твое,/ яко благо пред преподобными Твоими:

 Серафиме похвало всерусская,/ Зрим тя преподобных сонаследника -/ Серафимов прежняго и новаго:/ Оваго бо сподобился еси явления преяснаго,/ Яко детища тому любезна святописателю,/ Инаго же сотаинника приснаго,/ Исповедания веры соревнителя,/ Иже в Вырице благословением твоим/ От безбожных премудре сокрытаго,/ Подвигом же прежнему уподобившася,/ И в последняя времена святоявленна./ Возгласим убо ликованием, о вернии,/ О чудней преподобносерафимстей троице:/ Сии, Триипостасне Боже Человеколюбче,/ От рода нашего суть.

 Слава, глас и подобен тойже:

 Отче святолюбезне Серафиме,/ Славы о ревнителю великаго Саровскаго отца,/ Трепетною рукою описавый/ Богородицы тому Пречистыя явление:/ Возгласи бо Славнейшая серафим апостолом/ О блаженном Божием угоднике/ Слово, еже и о тебе исполньшееся,/ От святых небес ти ныне возглашаемое,/ И от русския земли доле вторимое:// Сей от рода нашего есть.

 И ныне, глас и подобен тойже:

О преславнаго чудесе:/ Небеси и земли Царица/ От святых сродников наших умоляема,/ До ныне землю Русскую покрывает/ И Лика Своего изображеньми милостивно обогащает:/ О, Владычице Державная,/ Не престани и на будущее время/ Во утверждении на Руси православия - // Милости и чудеса изливати до века. Аминь.

  На ли­тур­ги́и

Бла­же́н­ны на 8, глас 4:

Стих: Бла­же́­ни ми́­ло­сти­вии,/ я́ко ти́и по­ми́­ло­ва­ни бу́­дут.

Божия ти объятия отверзаются, мира отрекшуся доброму пастырю, имя и житие восприемлющу серафимския.

 Стих: Бла­же́­ни чи́с­тии се́рд­цем,/ я́ко ти́и Бо́­га у́з­рят.

Дивится небо, радуется же земля о Дивеевстей летописи, обручающей ти сугубое дерзновение к преподобному, иже и небесный предуготовляет венец серафимовей по святым любви твоей

 Стих: Бла­же́­ни ми­ро­тво́р­цы,/ я́ко ти́и сы́­но­ве Бо́­жии на­ре­ку́т­ся.

Юже зрел еси любовь, в преподобном предивную, о сей миру свидетельствуеши, Серафиме, о сем ангеле на земли, о человеце небеснем, иже исполни, явивыйтися, сердца ти мольбу пламенную – се, во веки с ним пребываеши, мучениче.

Стих: Бла­же́­ни из­гна́­ни пра́в­ды ра́­ди,/ я́ко тех есть Ца́р­ст­во Не­бе́с­ное.

О даров пребогатых, имиже осени тя благодать Божественная, отче! О труда твоего неусыпнаго! О духовных плодов новаго Дамаскина русскаго!

Стих: Бла­же́­ни ес­те́, егда́ по­но́­сят вам, и из­же­ну́т,/ и ре­ку́т всяк зол гла­го́л на вы, лжу́­ще Ме­не́ ра́­ди.

Обдержим болезньми, труды непомерными отягчен, се в тихую гавань управляеши корабль души, Серафиме, да к закату багряному пламенна ти жития уготовишися.

Стих: Ра́­дуй­те­ся и ве­се­ли́­те­ся,/ я́ко мзда ва́­ша мно́­га на не­бе­се́х.

Что истязания ваша ми болезнями преистязанну, емшим его беззаконным Серафим вопиет, что суды ваша имущу на суд отъити - к осужденну мя ради Христу, неумытну Отцу, очищающу Духу.

Сла́­ва: Ангелы предсретают тя, Серафиме, отверзаются, святе, Отча объятия в небесех, Сына ти благодать и причастие во веки Духа.

И ны́­не: Егда́ сла́в­нии но­во­му́­че­ни­цы/ воз­дох­ну́т о нас Бо­го­ро́­ди­це,/ упо­ва́­ем То́ю спа­се́­ние улу­чи́­ти/ и во­зо­пи́­ти Бла­го­сло­ве́н­ней:// Яже о всех бла­га́я Ма́­ти, сла́­ва Те­бе́.

Про­ки́­мен, глас 7:

Те­бе́ ра́­ди, Го́с­по­ди,/ умер­щв­ля́е­ми ес­мы́ весь день. Стих: Вме­ни́­хом­ся, я́ко­же о́в­цы за­ко­ле́­ния.

Апо́­стол к Ри́м­ля­ном, за­ча́­ло 99

Ал­ли­лу́­иа, глас 4: Воз­зва́­ша пра́­вед­нии, и Гос­по́дь ус­лы́­ша/ их, и от всех скор­бе́й их из­ба́­ви их. Стих: Мно́­ги ско́р­би пра́­вед­ным,/ и от всех их из­ба́­вит я Гос­по́дь.

Евангелие от Иоанна, зачало 52

   Молитва
cвященномученику митрополиту Серафиму Чичагову

О Боголюбезне Серафиме, велий во святителех и славный в мученицех! Пламенное восхождение твое лицезряще во обители горния, недоумеем, како благохвалити тя, паче же ти возследовати, дивный отче. Вемы бо воина тя предобра, храбрством изрядна и во бранех неодолима. Вемы тя и врача благодатна, в терпении неколеблема и во искусстве преизящна. Ты и живописания даром Церкви послужил еси и сладкопения талант Господеви принесл еси. Паче же, пастырю благий, аще и отреклся еси суеты мира, обаче вся тяготы и скорби того вмещал еси в пространное твое сердце. Не довлеет лета повествовати нам, паче же уразумети леностным умом непрестанныя ти труды по обителей святых летописанию, Серафима преподобнаго прославлению, жизни устроению церковней, разделений горьких врачеванию. Паки и в изгнаниих и заточениих образ веледушия и смирения крайняго светоявил еси, архиерею Божий. Над сим же всем солнцесияет мученический ти венец. Вся убо превозмогл еси о укрепляющем тя Христе. Сего ради в памяти твоей единяемся и усердно просим: не остави нашей худости, укрепи ны о Господе, еже заповеди Его непорочно хранити, еже Церковь святую от соблазн избавити вражиих, еже горняя нам мудрствовати, греховных же отступати и суетных. Се бо и дерзновение превелие, еже стяжал еси пред престолом Божиим, вемы, пресвятый наш отче. Сим утешаемся и молитвенному твоему заступлению себе о Господе предаем ныне и присно и во веки веков. Аминь.

Просмотров: 12187