мчч. Вере Надежде, Любови и матери их Софии

17/30 сентября

(Дополнение до бденной службы)

На литии стихиры, глас 2. Подобен: Егда от Древа:

О сиятельнаго душ ваших, благонравныя сестры́! / О мучителя злокозненна немощи! / О дерзания вам, о презрения к ласкательствам, / О болей, о терпения, христозванныя девы! // О страдания лютаго и прекраснаго!

О премудраго корене, Веро, первородная лилие! / О глагол боговерных ти, нестерпимых мучителю! / О биения рабска, силе веры недвижимей! / О сосцев урезания девы, о железа разжженнаго, / О смолы ей кипящия, духом веры угашенней! / О болей, о терпения дщери старшенствующия! / О глагол крепкодушных лицезрящия сия матере! / О главы́ благоверныя усекновения! // О страдания лютаго и прекраснаго!

О Надеждо, лозы живоносныя отрасле! / О биения долгаго, умножающуся ти упованию! / О огня, разжигающа ревность мученицы! / О железных когтей, с миром связь раздирающих! / О котлу растопившуся пламенным благонадежием! / О болей, о терпения ученицы Распятаго! / О словес медоточных сокрушенныя матере! / О конца ти, надеждей небес преисполненней! // О страдания лютаго и прекраснаго!

О юнейшая! О богоименная! / О биенная палицею, колесова́нная! / О кровей истечения, напаяющих землю! / О пе́щи, обжигающей и мучителей! / О буравы, всем Любовию Бога славящия! / О болей, о терпения ти, о Любы христоносная! / О пресирыя матере сладкоречно дыхание! / О главы отсечения, ко Христу взяту духу! // О страдания лютаго и пре-краснаго!

Слава, глас и подобен тойже:

Еда забудет мати отроча свое - глаголет пророк, / И не помилует ли исчадия чрева своего, / Утешается убо Вера материнскою верностию, / Утешается упованием матерним и Надежда, / Утешается Любы матере любвеобилием: / Кто утешит Софию, кто дерзнет слово молвити? / Кто пожерл Богу противодостойное? / Се сама богомудрая сие сердцем весть: // Се Сама Богородица, се Мати Распятаго.

И ныне, глас и подобен тойже:

О страдания непостижна человеком, / О оставленности неописуемыя: / У Креста предстоит матерей утешение, / Распалается сердцем, Яже дев упование: // Се Сама Богородица, се Мати Распятаго.

На стиховне стихиры, глас 2. Подобен: Доме Евфрафов:

Риме - граде вечне / Древнее оставль нечестие / Ясным озариcя подвигом / Дщерей ти предобрых // Материю просвещенных мудрою.

Стих: Приведутся Царю девы в след ея, искренния ея приведутся Тебе:

Церковь Божия / Весело взыграй псаломски:/ Девы бо доброименныя / Возводимы в царст-венная, // Слову матере последовавше мудрыя

Стих: Приведутся в веселии и радовании, введутся в храм Царев:

Честная первомученик собрания / Ангель-ским сретайте пением / Юных дев поправших змия древняго / Естество прешедших мукою // В сонме вашем водворяющихся.

Слава, глас и подобен тойже:

Галлия прекрасная / Возликуй молитвами / Величай страдания / Почивающих под сенью ти // Христославных мучениц.

И ныне, праздника

НА ХВАЛИТЕХ, стихиры на 4, гл.8 :

Верою святии вси содеяша правду,/
Получиша обетования,/
Угасиша силу огненную./
Сице бо апостол языков провещавает/
И о славнем, Веро, страдания подвизе,/
Иже бысть ти восход к небеси тверд,/
Идеже во славе воистину нетленней/
Пребываете три сия, о нас молящеся://
Вера с Любовию и Надеждою.

Яко чада послушания,/
Совершенне уповайте/
На приносимую верным благодать/
Откровением Иисус Христовым:/
Дерзновенно ин первоверховен глаголет./
Сего убо зову отверзе чуткий Надежда слух/
Исполняя Писание страдальческим подвигом,/
Единящем три сия, о нас молящихся://
Веру с Любовию и Надеждою.

Познахом любовь, юже имать Бог к нам, -/
Любви апостол и богослов вопиет,/
Паки вещает, яко Бог любы есть,/
И в Том пребывают делателие истинныя любве./
Сему пачеестественным страданием,/
И самою смертию за всех Жизнь,/
Свидетельствова юнейшая из триех,/
Иже о единении нашем ныне молящиися://
Вера с Любовию и Надеждою.

Глаголет премудрый о страсе Господни,/
Яко той начало премудрости есть./
Сия во уши дщерей и пречиста сердца/
Влагает блаженная мати София./
Темже вено честнаго страдания/
Возвращают сердцу оныя непорочныя сестры -/
С премудрою убо материю во веки веселящеся/
Пребывают ныне три сия и о мире молятся//
Вера, Надежда и Любы.

Слава, глас тойже:

О предивна Божия домостроительства,
О чудес Троицы Живоначальныя,
Благодатию сердца возпламенившея
Четверицы немощныя естеством,
Но ревностию о Господе изрядствующея:
Се же богомудрою материю вдохновенныя,
Яко горлицы вознесошася к небеси,
Идеже пребывают три сия, о нас молящеся:
Вера с Любовию и Надеждою.

Просмотров: 1087