Служба новомучеником Шуйским

священномучеником Павлу и Иоанну, мучеником Петру, Николаю, Авксентию, Сергию и мученице Анастасии

(27.04 /10.05)

Великая вечерня

Стихиры на Господи, воззвах: Праздника - 3 и сия 5 - святым:
глас 2, подобен «Егда от древа»:

На издревле славней святостию Руси /
Окаянным днем зачинающимся, /
Се - исконный человеконенавистник враг /
Братоубиййственну воздвизает брань /
Богоборным землю опустошающим лютостию, /
Верным же среде глада укрепляющимся /
Жизноподательным словом Божиим - /
Сице Жизни ученику и Богослову вечне глашающу: //
Свет во тме светится, и тма Его не объят.

Лишению крайню постигшу люди и мору ужасну, /
Правды не взыскуя, не ведая милости, /
Злохитростны изобретают повеления /
Судии беззаконнии и безчеловечнии: /
Святотатство убо тщатся взаконити - /
Церкви Божией упованием воздыхающей /
Человеколюбцу и Питателю всех: /
Не лиши, о Правосуде, милования люди Твоя, //
Се бо Свет во тме светится, и тма Его не объят.

Несть рабом Вседержителевым глада ради отчаяния: /
Верою бо избыточествуют правды Христовы рачитилие, /
Неколебими защитницы святынь являются,
Древния Шуи и Палеха слава новая и похвало /
От сограждан благочестивых почтением свидетельствуеми, /
От безбожных же лютоненавидением: /
Тако души полагают святии о Церкви Божии /
Со апостолом любве о дусе глашающе, //
Яко Свет во тме светится, и тма Его не объят.

Яко истины свидетелие небоязненнии, /
Яко Божия народа первостоятелие /
Обличают умышления сатанинския /
Богоборных прещения попирающе, /
Возстают стеною нерушимою /
Храмом Пречистыя Одигитрии и Честнаго Креста, /
Светозарный Павел и Рождествоименный Иоанн /
Подвизая люди евангельским исповеданием: //
Се бо Свет во тме светится, и тма Его не объят.

Приидите, небеснии соотчичи наши, /
Оградите от высоты горния сродную вам плача юдоль /
С нами станите полком недвижимым, /
Да не будут святая в попрание, /
Да не разорением обезчестится земля - /
Сице взываша Христовы мученицы /
Николай и Авксентий, с Петром же Сергий и Анастасиею, /
Верою и кровию свидетельствующе, //
Яко Свет во тме светится и тма Его не объят.

Слава, глас 5: Мужайся, Христова Церковь /
Рази верою всуе борющия, /
Се бо воини твои святии шуйстии мученицы /
Молят Подвигоположника Христа: /
Спаси, Господи. люди Твоя //
И благослови достояние Твое.

И ныне: Праздника

 

Вход, прокимен дне и чтения 3:

Плача Иеремиина чтение.

Помяни, Господи, что бысть нам: призри и виждь укоризну нашу: достояние наше обратися к чуждим и домы нашя ко иноплеменником: сири быхом, несть отца, матери нашя яко вдовы. Воду нашу за сребро пихом, дрова наша за цену куповахом: на выя нашя гоними быхом, трудихомся, не почихом. Египет даде руку, Ассур в насыщение их. Отцы наши согрешиша, и несть их, мы же беззакония их подъяхом. Раби обладаша нами, избавляющаго несть от руку их. В душах наших носихом хлеб наш, от лица меча в пустыни. Кожа наша аки пещь обгоре, разседошася от лица бурей глада. Жен в Сионе смириша, девиц во градех Иудиных. Князи в руках их повешени быша, старейшины не прославишася. Избраннии плачь подяша, и юноши в кладе изнемогоша. И старцы от врат оскудеша, избраннии от песней своих умолкоша. Разсыпася радость сердец наших, обратися в плачь лик наш, спаде венец со главы нашея: горе нам, яко согрешихом. О сем смутися сердце наше, о сем померкнуша очи наши. На горе Сионе, яко погибе, лисицы ходиша. Ты же, Господи, во веки вселишися, престол Твой в род и род. Вскую во веки забываеши нас, оставиши ли нас в продолжение дний? Обрати ны, Господи, к Тебе, и обратимся, и вознови дни нашя якоже прежде. Яко отревая отринул еси нас, разгневался еси на ны зело.

Пророчества Данилова чтение

В пе́рвое лѣ́то Да́рiа сы́на Ассуи́рова, от пле́мене Ми́дска, и́же ца́рствова во ца́рствѣ Халде́йстѣмъ, въ лѣ́то пе́рвое ца́рства его́, а́зъ Данiи́лъ разумѣ́хъ въ кни́гахъ число́ лѣ́тъ, о не́мже бы́сть сло́во Госпо́дне ко Иеремі́и проро́ку, на сконча́нiе опустѣ́нiя Иерусали́мля се́дмьдесятъ лѣ́тъ. И да́хъ лице́ мое́ къ Го́споду Бо́гу, е́же взыска́ти моли́твы и проше́нiя въ постѣ́ и во вре́тищи и пе́пелѣ, и моли́хся ко Го́споду Бо́гу моему́ и исповѣ́дахся и рѣ́хъ: Го́споди, Бо́же вели́кiй и чу́дный, храня́й завѣ́тъ Тво́й и ми́лость Твою́ лю́бящымъ Тя́ и храня́щымъ за́повѣди Твоя́: согрѣши́хомъ, беззако́нновахомъ, нече́ствовахомъ и отступи́хомъ и уклони́хомся от за́повѣдiй Твои́хъ и от судо́въ Твои́хъ и не послу́шахомъ ра́бъ Твои́хъ проро́ковъ, и́же глаго́лаша во и́мя Твое́ ко царе́мъ на́шымъ и князе́мъ на́шымъ, и отце́мъ на́шымъ и всѣ́мъ лю́демъ земли́. Тебѣ́, Го́споди, пра́вда, на́мъ же стыдѣ́нiе лица́, я́коже де́нь се́й, му́жу Иу́дину, и живу́щымъ во Иерусали́мѣ, и всему́ Изра́илю, и бли́жнимъ и да́льнимъ во все́й земли́, идѣ́же разсѣ́ялъ еси́ я́ та́мо, во отверже́нiи и́хъ, и́мже отверго́шася Тебе́, Го́споди. Тебѣ́, Го́споди, е́сть пра́вда, на́мъ же стыдѣ́нiе лица́, и царе́мъ на́шымъ и князе́мъ на́шымъ и отце́мъ на́шымъ, и́же согрѣши́хомъ Тебѣ́. Го́споду же Бо́гу на́шему щедро́ты и очище́нiя, я́ко отступи́хомъ от Го́спода и не послу́шахомъ гла́са Го́спода Бо́га на́шего, ходи́ти въ зако́нѣхъ Его́, и́хже даде́ предъ лице́мъ на́шимъ руко́ю ра́бъ Свои́хъ проро́ковъ. И ве́сь Изра́иль преступи́ зако́нъ Тво́й, и уклони́шася е́же не послу́шати гла́са Твоего́: и прiи́де на ны́ кля́тва и закля́тiе впи́саное въ зако́нѣ Моисе́а раба́ Бо́жiя, я́ко согрѣши́хомъ Ему́. И уста́ви словеса́ своя́, я́же глаго́ла на ны́ и на судiи́ на́шя, и́же суди́ша на́мъ, навести́ на ны́ зла́я вели́кая, яковы́хъ не бы́сть подъ всѣ́мъ небесе́мъ, по [всѣ́мъ] бы́вшымъ во Иерусали́мѣ, я́коже е́сть пи́сано въ зако́нѣ Моисе́овѣ, вся́ зла́я сiя́ прiидо́ша на ны́: и не помоли́хомся лицу́ Го́спода Бо́га на́шего, отврати́тися от непра́вдъ на́шихъ, и е́же смы́слити во все́й и́стинѣ Твое́й, Го́споди. И убуди́ся Госпо́дь Бо́гъ на зло́бу на́шу и наведе́ сiя́ на ны́, я́ко пра́веденъ Госпо́дь Бо́гъ на́шъ во все́мъ дѣя́нiи Свое́мъ, е́же сотвори́, и не послу́шахомъ гла́са Его́. И ны́нѣ, Го́споди, Бо́же на́шъ, Иже изве́лъ еси́ лю́ди твоя́ от земли́ Еги́петскiя руко́ю крѣ́пкою и сотвори́лъ еси́ Себѣ́ Самому́ и́мя, я́коже де́нь се́й, согрѣши́хомъ, беззако́нновахомъ. Го́споди, всѣ́мъ поми́лованiемъ Твои́мъ да отврати́тся я́рость Твоя́ и гнѣ́въ Тво́й от гра́да Твоего́ Иерусали́ма, от горы́ святы́я Твоея́: я́ко согрѣши́хомъ непра́вдами на́шими и беззако́нiемъ оте́цъ на́шихъ, Иерусали́мъ и лю́дiе Твои́ во укори́зну бы́ша во всѣ́хъ окре́стныхъ на́съ. И ны́нѣ, Го́споди, Бо́же на́шъ, услы́ши моли́тву раба́ твоего́ и проше́нiе его́, и яви́ лице́ Твое́ на святи́лище Твое́ опустѣ́вшее, Тебе́ ра́ди, Го́споди. Приклони́, Го́споди, Бо́же мо́й, у́хо Твое́ и услы́ши, отве́рзи о́чи Твои́ и ви́ждь потребле́нiе на́ше и гра́да Твоего́, въ не́мже призва́ся и́мя Твое́, я́ко не на на́шя пра́вды упова́юще поверга́емъ моле́нiе на́ше предъ Тобо́ю, но на щедро́ты Твоя́ мно́гiя, Го́споди. Услы́ши, Го́споди, очисти, Го́споди, вонми́, Го́споди, и сотвори́, и не закосни́ Тебе́ ра́ди, Бо́же мо́й, я́ко и́мя Твое́ призва́ся во гра́дѣ Твое́мъ и въ лю́дехъ Твои́хъ.

Премудрости Соломони чтение.

Праведницы во веки живут, и в Господе мзда их, попечение их у Вышняго. Сего ради приимут царствие благолепия, и венец доброты от руки Господни: зане десницею покрыет я, и мышцею защитит их. Приимет всеоружие рвение Свое, и вооружит тварь в месть врагом. Облечется в броня правды, и возложит шлем, суд нелицемерен. Приимет щит непобедимый, преподобие: поострит же напрасный гнев оружие: споборет же с Ним мир на безумныя. Пойдут праволучныя стрелы молниины, и яко от благокругла лука облаков, на намерение полетят. И от каменометныя ярости, исполнь падут грады. Вознегодует на них вода морская, реки же потопят я нагло. Сопротив станет им дух силы, и яко вихор развеет их: и опустошит всю землю беззаконие, и злодейство превратит престолы сильных. Слышите убо царие и разумейте, навыкните судии концев земли. Внушите держащии множества, и гордящиися о народех язык. Яко дана есть от Господа держава вам, и сила от Вышняго.

 

Стихиры на литии глас 7:

Болезнуя сердцем пастырским / об овцех, гладом истаяваемых, /
о святынех, лукавством расхищенных, /
сподвизает Павел Иоанна /
давидским из глубины стенанием: /
внидоша воды слезныя до души моея, /
да не постыдятся о нас терпящии Тя, Господи сил, //
ниже да посрамятся ищущии Тебе.

Поношения поносящих, Боже, Тебе /
нападоша на ны, рабы Твоя, /
- воздыхают согласием мученицы - /
нам же, Спасе, за Тя умрети честь : /
не забуди, услыши ны в милости - //
се бо ныне время благоволения Твоего.

Слава: Се течение совершается /
возглашается суд убийственен: /
Иоанне и Павле, друзи-пастырие, /
к заколению с сострадальцем Петром ныне тщитеся, /
пред миром безгласны, яко агнцы образом, /
духу дышущу псалмопением: /
услыши ны Господи, яко блага милость Твоя, /
поношение претерпехом Тебе ради, Святый, /
душам нашим вонми и избави я, //
спасение Твое, Боже, да приимет ны.

И ныне: Разверзающуся на Руси лихолетию, /
плачем вдов и сирот преисполнену, /
совершенными сиротами и вдовицами/
неутешней земли приложися, /
устреленным вам, святии, лютостию, - /
в небе Русском звездами убо возсияли есте. /
Нам же, светом ваших молитв просвещаемым, /
покаяния да усвоится песнь: /
Свят, Свят, Свят еси, Боже Праведне, //
Богородицею помилуй нас.

 

На стиховне стихиры, глас 2, подобен «Доме Евфрафов»:

Земле Шуйская,
Саде преподобных,
Подвигами тех красуяся,
Процветай страданием
Славных новомученик.

Дом Пречистыя Одигитрии
С ним же Палеха соборный храм
Да возславят пастыри,
Овцы по себе привлекшия
Господеви ся пожрети мученичеством.

Соборе первоновомученик,
Целованием сретай сограждан
Иерусалима горняго,
Шуи похвалу и Палеха -
О святынех Церкви души положившия.

Слава, глас и подобен тойже:
Христозваннии людие,
Бодрствуим в молитвах:
Се бо ввери ны Господь
Неусыпающим ходатаем -
Шуйским новомучеником.

И ныне: Праздника

 

Тропарь, глас 4:

Пастырие духом единонравнии, / о святынех мученики сподвизают стояти до смерти, / орошают своими кровми землю Шуйскую, / темже яко новыя Царства Божия наследницы, / благодатию от небес // светоозаряют верныя во веки.

 

Утреня

По 1-й кафизме седален, глас 6:

Заступлением не оставите, о страдальцы пастырие, укрепите на борющия, дерзновением в вере утвердите ны.

Слава и ныне: Праздника:

По 2-й кафизме седален, глас 6:

Несть отчаяния нам, несть одоления от врагов, Одигитрии Пресвятей и страдальцем-пастырем верныя ко спасению наставляющим.

Слава и ныне: Праздника:

 

Величание мучеником общее:

По полиелее седален, глас 8:

Честне почитати божественная / учит критский, паче же вселенский вития, / сего ради мученицы шуйстии / о святынех церковных до смерти подвизаются, / да от Иерусалима горняго ко Господу вечную вознесут хвалу, // призирая на ны присно.

Слава и ныне, Праздника

 

Прокимен, глас 4: Тебе ради, Господи, умерщвляеми есмы весь день: Стих: Вменихомся, якоже овцы заколения:

Евангелие от Матфеа: зачало 36

Стихира по Евангелии, глас 6:

Святым иже суть на земли Его,/
новомучеником преславным,/
удиви Господь хотение Свое,/
еже Церковь Русскую паки прославити/
дерзновенным сих ходатайством,/
сего ради о земле Шуйстей умоляющим,/
Павлу со Иоанном и сострадальцы возопиим://
радуйтеся, заступницы наши и образи верным.

 

Канон Праздника и сей святым, глас 3-й, егоже краегранесие: Иже с Павлом и Иоанном мученики любовию воспоим

Песнь 1

Ирмос. Фараони колесницы глубиною покрыв Господи,/ море разверзл еси/ и спасл еси песньми поющия Тя, // люди Израильтеския.

Иисусе Всемилостиве, / мучеников о Вдохновителю, / слово ми вдохни возславити страдальцы Твоя,/ немощь мою презирая, Слове, // милостию, Боже, снисходя.

Жертвы Богу одушевленныя/ тмами устреляются от безбожных,/ зверонравне власть восхищающих: / се - царя и простаго, старцев со младенцами лиется кровь, // и рука Господня еще высока.

Евангелие начало предвещает болезнем, / апостол о пагубе среде лести мирных словес вопиет,/ пророком согласно вещающим о гладе слова Божия: // и рука Господня еще высока.

Слава: Самоизмышленныя пагубы рачителие, / мужие кровей, паки гнева сыны / тысящам тем страдальцев / обручают насильною татьбою глад, / Патриарху Святейшу слезно миру взывающу// о страдании Руси.

И ныне: Побори борющия, малодушныя утеши, / подвизающихся укрепи, / упование и радость наша, // Пресвятая Одигитрие.

Песнь 3

Ирмос: Утверждение и очищение / подаждь нам, Сыне Божий, // и спаси ны, яко Человеколюбец.

Адскою преисполнени завистию, / сатанинския слуги на достояние Церкве посягают дерзостне, / во еже предати святыни / гнуснаго ради прибытка // святотатцем иноплеменником.

Вои насылают окаянныя, / тщетным поучаются, / во еже на Божий народ брань воздвигнути, // паче Зиждителя низложити всяческих.

Лукавнообразен, лютостию Исавра древняго превозшед, / иский поглотити кого, / на святыя образы новый лев возстает, / паче же на люди шуйския, // благочестием изрядствующия.

Слава: О безчеловечия врагов! / О сожженней тех совести! / О пастырей добрых небоязненности! // О верности мучеников!

И ныне: Мати Милостивая, Пресвятая Дево! / Чада соблюди церковныя, // в вере укрепи, утоли тех скорби.

Седален, гл.6:

Леденящия душу ужасы / среде глада всенародна / сердце терзают патриаршее, / шуйским мучеником на защиту святынь // мужественне пред враги возстающим.

Слава и ныне: Праздника

Песнь 4

Ирмос: Положил еси к нам твердую любовь, Господи, / Единороднаго бо Твоего Сына за ны на смерть дал еси. / Темже Ти зовем благодаряще: // слава силе Твоей, Господи

Именем нареклся еси апостола язык, / нраву того причастник явлься, / трудник Божия Церкви показался еси неусыпающий, о Павле, / тайноводствуя первее юныя, // послежде и мученики ко Христу.

Именем нареклся еси апостола любве, / ревность Крестителеву являя, / с неюже дерзновение пред враги притяжал еси, Иоанне, / по стопам сотаинника // до Голгофы твоея следуя.

О Христе не точию веровати по слову апостольску, / паче же и страдати сподобился еси, Павле, / темницею первее от безбожных истязан, // возрастающу убо духу ти упованием.

Слава: Адамантовы исполнь духа крепости, / возглашает людем Иоанн / слово огненное патриаршее, / обручая си козни безбожных, // заточение горькое.

И ныне: Непорочная, взыщи блудныя, / утверди нам ко Господу шествие, // пути верным исправляя, Одигитрие.

Песнь 5

Ирмос: Твой мир даждь нам, Сыне Божий, / иного бо разве Тебе бога не вемы, // в вышних со Отцем и Духом славимаго.

Набат ко святилищу созывает верныя, / крайностию ярящимся супостатом врагом, / абие являемей от тех жертве / - Николаю малу именем, // первомученику убо шуйскому житием.

Огласися кампаном соборным воздух, / се ко храму Анастасия тщится, / на степенех церковных устреляется лютыми, // да лучшее воскресение улучит.

Мученицы доблии со Авксентием Сергий / новыми жертвами первым двоим последствуют, / да честною со онеми предстанут Господу четверицею, // да явятся соотчичам присно ходатаи.

Слава: Матере ради Божия / избрали есте умрети, шуйстии мученицы, / не престаните убо // Ту о нас умоляюще.

И ныне: Устави смятение страстей, / управи от врагов напаствуемых, / приими души, о святыни Твоей положенныя, // о Державная Владычице.

Песнь 6

Ирмос: Возведи от тли мя, Господи Боже мой, Иона вопияше,/ и аз вопию Ти: / из глубины избави мя, Спасе, многих моих зол, // и к свету Твоему, молюся, настави.

Честных и невинных страдалец / не довлеет крови зверонравным, / се бо паки волчию яростию / на пастыри и овцы тех // лающе устремляются.

Еже жити Христос нам есть, / еже умрети приобретение, / возглашают беззаконным судиям пастырие-мученицы, / мирность храня духа, / токмо о пастве и присных // душею терзаяся.

Нам судите горькую смерти чашу, / неповинных сих убо оставите ити, / вопиют евангельски пастырие-мученицы, / яко стеною ограждая многия, / присному же Петру избираему Господем // в жертву Си чистую.

Слава: Истязание тягостно - велие от Господа утешение, / - вопияху мученицы - / неправеден суд - и той при свете явится Истины, / Жизни убо победою пожерта бысть смерть: // слава, слава Ти, Боже, о всех.

И ныне: К Тебе обращение наше, / о Тебе верным надежда, / Тебе же слезы теплыя и Тебе похвала, // Дево Пресвятая, Мати Света, Богородице.

Кондак, глас 3:

Тебе ради, Господи, / Одигитрии ради Заступницы, / за Святую Церковь Божию дерзаем на смерть, / - вопияху мученицы добропобеднии, - / ихже предстательством, о вернии, // да не лишимся милости в день судный.

Икос:

Земнии есмы и в землю отыдем, - / вопияху шуйстии мученицы - / да не устыдимся, раби недостойнии, Царицы Небесныя, / прещений безбожных да не устрашимся, / убо Матери Божией верность да явим сыновнюю, / до конца претерпим, / тако предстательством Ея дерзновение стяжем, // не лишимся милости в день судный.

Песнь 7

Ирмос: Якоже древле благочестивыя три отроки / оросил еси в пламени халдейстем, / светлым Божества огнем и нас озари, / благословен еси, взывающия, // Боже отец наших

Имене Твого ради, Господи, / вся во уповании претерпим - / вопияху шуйстии мученицы - / присных милостию не остави, // Боже отец наших

Любовь убо познахом Твою, Святый, / надеяние Ти возлагаем, Щедре, / верою Тя исповедующе, // Боже отец наших.

Юже Честною стяжав Кровию, / Невесту Ти возлюбленну Церковь, / ныне горнилом скорби, Праведне, истязуеши, / да и в нас не посрамится Святость Ея, // Боже отец наших.

Слава: Богоборным лютующим, немощь оных является, / и собою не властвующим, / вся хотящим восхитити, / вся, Державне, во веки Твоя, // Боже отец наших.

И ныне: Окаянных рази святоненавистников лютых, / заблудшим пути исправи, / дерзновением верныя укрепи, / о Державная Владычице, // Мати Бога отец наших.

Песнь 8

Ирмос: Благодетеля и Бога и Избавителя всех, / и Творца всего мира, / священницы пойте, // людие, превозносите во вся веки.

Вечери Твоея приими, Спасе, сослужители / - к устрелянию влекомыя, / молчанием взываху мученицы - / покажи причастники невечерняго дне Царствия Твоего, // да поем вечне Господа и превозносим во веки.

Искупил ны еси от клятвы законныя, / просвети убо Древом Крестным, / Троическия не отвергшихся силы, / троегласно духом слезяху ко Господу мученицы, / во еже пети вечне Того // и превозносити во веки.

Юнцы тучнии обыдоша ны, / давидским дыханием вопияху мученицы, /да противимся тем именем Господа, // поюще и превозносяще Его во веки.

Благословим: Верою не прияша пророцы избавления, / руганием и ранами искушени быша, / еще же и уз и темниц, / тако со апостолом воздыхаху мученицы, / устреляеми безчеловечными, // Ангелы на небесех сретаеми.

И ныне: Одигитрие, Шуи похвало и Смоленска славо, / Державная Руси Владычице, / вся настави ко спасению верныя, // миру надеяние непостыдное.

Песнь 9

Ирмос: Благословен Господь Бог Израилев, / воздвигнувый рог спасения нам, /в дому Давида отрока С в оего, /милосердия ради милости, / в нихже посети нас Восток с высоты, // и наставил ны есть на путь мира.

Светозарне о Павле пастырю, / предстоятелю о честный шуйским мучеником, / убо паству новую заступи, // на путь мира сию настави.

Палешаном безценно сокровище, / Иоанне о тех просветителю, / сотаинниче Павла преискренне, / возрасти, воспитай в вере люди твоя, // на путь мира настави.

О Николае со Авксентием, / Петре вкупе с Анастасиею! / Крови давшие - Дух приимшие. / О блаженная четверице святых! / Умоли за ны дерзновением, // на путь мира настави.

Слава: Исповедуем Троицу Пребожественную, / во Святей спасаемся, Церкви, братие. / Новомучениками Сия силу нову обрет, // на путь мира ны присно наставит.

И ныне: Милосердия Мати, Пресвятая Владычице, / щит еси и прибежище верным: / не лиши ны заступления, / на путь мира настави.

Светилен: Се Шую Павел светоозаряет, се Иоанн светосияет окрест, блистают мученицы славою небесною: се ко Христу стезя нам расширяется.

Слава и ныне: Праздника

На хвалитех стихиры 3, глас 5, подобен «Радуйся»:

Радуйтеся, о крестоноснии Павле и Иоанне,/
Ревновавшии о благодати церковным светочем:/
Крестителю дерзновением и силою правды,/
Богослову-апостолу всетерпеливою любовию,/
Петру верховному в смирении первенством,/
Апостолу же язык единением духа с паствою,/
Се - иных сподвигшии страданием прославити//
Троицу Единосущную и Нераздельную./

Радуйтеся, сограждане мучеников, /
Не возмогоша бо от любве вас разлучити Божия,/
Ни гонения, ни теснота, ни смерть,/
Древним уподобившиися страдальцем/
Жаждою себе пожрети Спасу совершенною любовию,/
О друзи искреннейшии Павле и Иоанне:/
И Дорковску сотаиннику дерзновение вдохнувшии, //
Да троегласно вечне славите Троицу Божественную.

Слава, глас 6: Братии меньшей не оставите, сильнии, /
оскудевшия ны добродетелию не забудите, милостивии, /
помяните ны, шуйстии мученицы, /
презирая убожество словес //
вас воспевших любовию.

И ныне: Праздника

НА ЛИТУРГИИ:

Блаженны: на 8: Праздника - 3 (песнь 3-я канона Празднику), и святым - 5 (песнь 8-я канона святым).

Прокимен Праздника и святых, гл.4: Тебе ради, Господи, умерщвляеми есмы весь день..

Апостол : К Римляном, зачало 99

Аллилуйя Праздника и святаго: Многи скорби праведным и от всех их избавит я Господь

Евангелие Праздника и святых: от Луки, зачало 106

Задостойник Праздника

Причастен Праздника и святых: Радуйтеся, праведнии, о Господе, правым подобает похвала.

Просмотров: 518