Служба священномученику Филосо́фу пресвитеру Петроградскому и сыновом его мучеником Николаю и Бори́су (память 31 мая)

Великая вечерня

Стихиры на Господи, воззвах: Празднику (аще есть)- 3, и сия – 5 (аще несть Праздника – повторяемым первым трием): глас 1, подобен: «Небесных чинов»:

Новогра́дстей земли́ радостотво́рно прозябение/ к тысящелетию Руси тайноуготовися,/ ти раждаему, о Филосо́фе, любомудре именуему,/ о лозы́ Кроншта́дтска святоделателя избранный грозде,/ во учении изрядствуеши духа возрастанием,/ преселя́ешися от благословения ти брачна во град Петров,/ отону́дуже тобою да просияет мирови// богоразу́мия нетле́нный Свет.

Я́ко на све́щнице поставлен, восприим пресвитерство,/от служения ти перва свидетельствуеши сана высоту,/ непорочно предстоя Престолу Божию, о Филосо́фе,/ проповедуя Евангелие Царствия, слово истины священнодействуя,/ обновляеши благода́тию любочестивый народ,/ и тако, мздою благаго обогащаяся икономства, / сиречь Духа исполнь Свята, являеши мирови// богоразу́мия нетле́нный Свет.

Како изрещи безмерное трудов твоих, како возславити,/ храмоздателю, о Филосо́фе, всеизряднейше? /от едина восходя благолепия, досязая к вышнему,/ я́ко адаманты диадиму си небесную/ украшая велекрасными святилищ земных,/ неуста́нностию подвига утешая Божия люди,/ Слова о ревнителю, дерзновением проповедуеш и// богоразу́мия нетле́нный Свет.

Благода́ти Всероссийска Иоа́нна па́стыря о насле́дниче,/ сорабо́тник о столичней па́стве тому явлься искреннейший:/ всеусе́рдием противу недуга пиянства подвизаешися,/устроя́я по подобию отца духовна до́мы трезвости,/ трудолюбием воспитуя прежде недуговавшия/ всеизря́дствуеши паки, я́ко нищих питатель -/ гла́дну укрепляя оных плоть,/ па́че же о душа́х рачи́тельствуя -/ ясноявля́ши житием и словом, о Филосо́фе,// богоразу́мия нетле́нный Свет.

И в лихую годину отступльства лютаго,/ среде́ разслабления миродержащаго/ возгара́ешися духом, Бо́жий светочу Филосо́фе,/ Всероссийска Собора о звездо ярчайшая,/ се - обличения твоя богоборных небоязненны, / исхода́тайствуют от Бога-Слова Всемилостива,/трегубый ти венец безсребреника, па́стыря,/ па́ки и мученика до́блественна,/ да приимет тя я́ко Истины свидетеля// присносу́щный Живо́т и Путь и миру Свет.

Слава, глас и подобен тойже:

Пред пламенною ти сердца милостию/ мно́гих блекнет всеусердие,/ пред богатством дерзновенна ти слова / оскудевает дух, умолкает помысл/ка́ко убо что речем о мучеников тро́ице:/ о Бори́се и Нико́лае, сыне́х ти верных,/ о тебе, испи́вшем до дна чашу страдания Филосо́фе: / а́ще не умо́лите Тро́ицу Живоначальную/ да ко́снется душ наших// Тоя́ нетле́нный Свет.

И ныне: Праздника или Догматик

Притчей чтение.

Вход, прокимен дне и чтения 3:

Па́мять пра́веднаго с похвала́ми, и благослове́ние Госпо́дне на главе́ его́. Блаже́н челове́к, и́же обре́те прему́дрость, и сме́ртен, и́же уве́де ра́зум. Лу́чше бо сию́ купова́ти, не́жели зла́та и сребра́ сокро́вища. Честне́йшая же есть ка́мений многоце́нных, все же честно́е недосто́йно ея́ есть. Долгота́ бо дней и ле́та живота́ в десни́це ея́, в шу́йце же ея́ бога́тство и сла́ва. От уст ея́ исхо́дит пра́вда, зако́н же и ми́лость на язы́це но́сит. Послу́шайте у́бо мене́, о ча́да, честна́я бо реку́, и блаже́н челове́к, и́же пути́ моя́ сохрани́т. Исхо́ди бо мои́ – исхо́ди живота́, и уготовля́ется хоте́ние от Го́спода. Сего́ ра́ди молю́ вас и предлага́ю мой глас сыново́м челове́ческим: я́ко аз, прему́дрость, устро́их сове́т, и ра́зум и смысл аз призва́х. Мой сове́т и утвержде́ние, мой ра́зум, моя́ же кре́пость. Аз мене́ лю́бящия люблю́, и́щущии же мене́ обря́щут благода́ть. Разуме́йте у́бо, незло́бивии, кова́рство, ненака́заннии же, прилага́йте сердца́. Послу́шайте мене́ и па́ки, честна́я бо реку́, и отве́рзу от усте́н пра́вая, я́ко и́стине поучи́тся горта́нь мой, ме́рзки же предо мно́ю устны́ лжи́выя. С пра́вдою вси глаго́лы уст мои́х, ничто́же в них стро́потно, ниже́ развраще́нно. Вся пра́ва суть разумева́ющим и про́ста обрета́ющим ра́зум. Научу́ бо вас и́стине, да бу́дет о Го́споде наде́жда ва́ша, и испо́лнитеся Ду́ха.

Премудрости Соломони чтение:

Уста́ пра́веднаго ка́плют прему́дрость: устне́ же муже́й му́дрых ве́дят благода́ть. Уста́ му́дрых поуча́тся прему́дрости, пра́вда же избавля́ет их от сме́рти. Сконча́вшуся му́жу пра́ведну, не поги́бнет наде́жда. Сын бо пра́веден ражда́ется в живо́т, и во благи́х свои́х плод пра́вды обы́мет. Свет пра́ведным всегда́, и от Го́спода обря́щут благода́ть и сла́ву. Язы́к му́дрых до́брая свесть, и в се́рдце их почи́ет му́дрость. Лю́бит Госпо́дь преподо́бныя сердца́, прия́тни же ему́ вси непоро́чнии в пути́. Му́дрость Госпо́дня просвеща́ет лице́ разу́мнаго. Постига́ет бо жела́ющия ю, пре́жде да́же разуме́ти ю, и удо́бь у́зрится от лю́бящих ю́. У́треневавый к ней, не утруди́тся, и бдяй ея́ ра́ди, вско́ре без печа́ли бу́дет. Я́ко досто́йных ея́ сама́ обхо́дит и́щущи, и во стезя́х ея́ явля́ется им благоприе́мне. Му́дрости никогда́же одоле́ет зло́ба. Сих ра́ди и рачи́тель бых добро́ты ея́, и возлюби́х ю́, и поиска́х от ю́ности моея́. И взыска́х неве́сту привести́ себе́, я́ко всех Влады́ка возлюби́ ю́. Таи́бница бо есть Бо́жия хи́трости, и обрета́тельница дел Его́. Труды́ ея́ суть доброде́тели: целому́дрию же и ра́зуму та учи́т, пра́вде и му́жеству, и́хже потре́бнее ничто́же есть в житии́ челове́ком. А́ще же и мно́гаго иску́сства жела́ет кто, весть дре́вняя, и бы́ти хотя́щая разсмотри́т: свесть изви́тия слове́с, и разреше́ния гада́ний, зна́мения и чудеса́ проразуме́ет, и сбытия́ време́н и лет; и всем сове́тник есть благ, я́ко безсме́ртие есть в ней, и благосла́вие во обще́нии слове́с ея́. Сего́ ра́ди бесе́довах ко Го́споду, и помоли́хся Ему́, и рех от всего́ се́рдца моего́: Бо́же отце́в и Го́споди ми́лости, сотвори́вый вся сло́вом Твои́м, и му́дростию Твое́ю устро́ивый челове́ка, да владе́ет бы́вшими от Тебе́ тварьми́, и да управля́ет мир в преподо́бии и пра́вде. Даждь ми Твои́х престо́лов приседя́щую прему́дрость, и не отлучи́ мене́ от о́трок Твои́х, я́ко аз раб Твой, и сын рабы́ни Твоея́. Посли́ ю с Небе́с от свята́го жили́ща Твоего́, и от престо́ла сла́вы Твоея́, да су́щи со мно́ю научи́т мя, что благоуго́дно есть пред Тобо́ю, и наста́вит мя в ра́зум, и сохрани́т мя в сла́ве свое́й. Помышле́ния бо сме́ртных вся боязли́ва, и погреши́тельна умышле́ния их.

Премудрости Соломони чтение (глава 3):

Пра́ведных ду́ши в руце́ Бо́жией, / и не прико́снется их му́ка./ Непщева́ни бы́ша во очесе́х безу́мных умре́ти, / и вмени́ся озлобле́ние исхо́д их, / и е́же от нас ше́ствие — сокруше́ние; / они́ же суть в ми́ре. / И́бо пред лице́м челове́ческим, а́ще и му́ку прии́мут, / упова́ние их безсме́ртия испо́лнено. / И вма́ле нака́зани бы́вше, / вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́. / Я́ко зла́то в горни́ле, искуси́ их / и я́ко всепло́дие же́ртвенное, прия́т я. / И во вре́мя посеще́ния их возсия́ют/ и, я́ко и́скры по сте́блию, потеку́т. / Су́дят язы́ком и облада́ют людьми́, / и воцари́тся Госпо́дь в них во ве́ки./ Наде́ющиися Нань разуме́ют и́стину / и ве́рнии в любви́ пребу́дут Ему́, / я́ко благода́ть и ми́лость в преподо́бных Его́ / и посеще́ние во избра́нных Его́.

Стихиры на литии глас 7:

Авраам, по реченному, Исаака роди, / Филосо́ф – сонасле́дники Царствия, // в книзе жизни вписанныя.

Иеффаева жертва похвальная / Филосо́фу се – вдохновение // пред враты Иерусалима горняго.

Се Креститель возносит Ти, Спасе, главу, / Филосо́ф – себе́ со возлюбленными: // тех о нас воздыхания ныне приими.

Слава, глас тойже:

Ужас бе ангелом видети, / человеки творимо вселютое: / терзанием святых душ предваряемое / устреляние безчеловечное: / се - от чад последнее послушание,/ се - отца дар крайний Небесну Отцу, / се - конечное предстояние Тро́ицы мученик - // живожертвенно приношение Тро́ице Пресвятей.

И ныне, глас тойже:

Внемлет ужасом Ти, Господи, Мати и Раба,/ Симеоново исполняется предречение: // Се Кресту предстоит Богородица.

На стиховне стихиры, глас 8:

О неколеби́мыя веры ва́шея, Бори́се и Нико́лае,/ послуша́нием родителю святовозрастшии, / житие́м честны́м о Господе утвержденнии, / адама́нтова крепость ваша, славно мученичество.

Стих: Праведник, я́ко финикс процветет, / я́ко кедр и́же в Лива́не умно́жится.

О надежды дерзновенныя вам, Бори́се и Николае,/ в подражании отцу труды неленостными/ воспитавшии дух к высочайшу подвигу/ непостыдно упование ваше, славно мученичество.

Стих: Насаждени в дому Господни / во дво́рех Бо́га на́шего процвету́т.

О любве вам, о Нико́лае, Бори́се, солнцепламенныя, / от Небесна Отца ниспосланныя, от земнаго святопреданныя,/ я́же вся́кою украси́ вас добродетелию, / да от смерти стя́жите славным мученичеством жизнь.

Слава, глас тойже:

Филосо́фе, о вити́е изящнейше,/ Филосо́фе, храмоздателю о искуснейше,/ Филосо́фе, неустанный Бо́жий трудниче,/ помяни нас от небес, великомучениче.

И ныне: Праздника или сей, глас тойже, подобен: О преславнаго чудесе!:

О преславнаго чудесе! Небеси и земли Царица…

Тропарь, глас 1

Ра́дуйся, Всеросси́йска па́стыря о дусе ча́до избра́нное,/ преизря́дными по́двиги святовозра́стшее,/ радуйся паки, просветителю верных, о Филосо́фе,/ от трудов неусыпных возшедый с верными сы́ны на Голгофу свою,/ да предстоите́ дерзновением Тро́ице Единосущней// и о нашем во Христе единении мо́литеся.

НА УТРЕНИ

По 1-й кафизме седален:

Па́стырю ревностнейше, о Филосо́фе,/ серафимския любве пламенем/ зовеши па́стыри попаляти грехи/ – от небес исполни слово сие// и на нас, отче.

Слава и ныне: Праздника или сей Богородичен:

Состраданием попали грехи верных,/ я́ко Мати Спаса еси Пречистая// и непостыдное нам надеяние.

По 2-й кафизме седален:

От волков мысленных,/ иже немощныя страстьми восхитити злодерзают овцы,/ словом и молитвою тыя исторгал еси,/ па́стырю необориме Филосо́фе,// соревнителем твоим к подражанию образе.

Слава и ныне: Праздника или сей Богородичен:

От нападений вражиих защити, Владычице,/ я́ко верное нам еси упование,// аще и немощию обложени есмы.

Величание:

Величаем, величаем вас, / священномучениче Филосо́фе со чады мученики Бори́сом и Никола́ем, / и чтим честная страдания ваша, / яже за Христа // прерпе́ли есте.

По полиелее седален:

Верою, Филосо́фе, Спасову слову внемлеши,/ и проповедуеши паки,/ я́ко и соблазном и ересем подобает явитися,/ обаче неколебимо соблюдется среде оных Церкве здание,// на камени веры основанное.

Слава и ныне: Праздника или сей Богородичен:

Нерушиму Тя стену исповедуем, Богомати,/ от соблазн многажды Тобою ограждени:/ и в грядущая смиренных чад// не посрами упования.

Прокимен, глас 4: Тебе ради, Господи,/ умерщвляеми есмы весь день

Стих: Вменихомся, я́коже овцы заколения

Евангелие от Матфеа, зачало 36

Стихира по Евангелии, глас 6:

Святым, иже суть на Руси святей,/ новомучеником преславным,/ удиви Господь хотение Свое,/ еже Церковь Русскую возродити,/ дерзновенных сих ходатайством,/ сего ради о Петрове граде и всей Руси умоляющим,/ Филосо́фу с верными сыны возопиим:// радуйтеся, светила ярчайшии тверди церковныя.

Канон Праздника или молебный Богородице и сей святому, глас 3, егоже краегранесие:

Божия трудника и витию, сотаинника Иоа́ннова, Филосо́фа пою священномученика

Песнь 1

Ирмос: Во́ды дре́вле ма́нием Боже́ственным / во еди́но со́нмище совокупи́вый / и раздели́вый мо́ре изра́ильтеским лю́дем, / Сей Бог наш / препросла́влен есть, // Тому́ еди́ному пои́м, я́ко просла́вися.

Боже Триипостасне,/ слово ми подаждь в дусе мирне,/ я́ко да единодушную воспою// Тро́ицу мученик.

Отче всемудре,/ како пети тя, како славити,/ паче же како ти возследовати// –о Филосо́фе, вразуми.

Жития твоего неудобоописуема нам высота,/ паки да огласится Филосо́фа слово,/ во еже внимати сему,// исполняти убо деянием.

Иже сердцем восприимет словеса Спасовы,/ и пути Того уклонитися не возможет отнюд,/ к жизни ведущу истинней:// се свидетельство нам от искусства твоего, отче святый.

Яже самостию заключена не пребудет вера жива,/ но служением являет себе неленостным,/ паче же и братолюбием,/ даже до исповедничества достигает, -// житием возглашаеши сие и словом, отче святый.

Трудом любве - по глаголу твоему святому, отче,/ - да обратимся ко Всещедрому,/ Иже вышше пророка явит Себе нам,// я́ко Бог Сый любве и благости.

Ревностию о любви святою паки смирением чистым/ – како вместити, отче, сия,/ - Богу кланятися зовеши в дусе и истине,/ да неветшающия Себе обители/ сотворит в нас Всесвятый Дух,// сиречь грады Царства Небеснаго.

Богородичен: Ученицы недостойни суще Спаса Всемилостива,/ вседобродетелию Матере Его пленени,/ коим паки уязвимся образом,// да житие обратим ко исправлению.

Песнь 3

Ирмос: И́же от не су́щих вся Приведы́й, / сло́вом созида́емая, / соверша́емая Ду́хом, / Вседержи́телю Вы́шний, / в любви́ Твое́й утверди́ мене́.

До безбожия откровенна,/ до лютейших времен достигл еси, отче святый, житием:/ се - последних о сем мира зрел еси// ближайшее сбытие.

Ныне, братие, единения время/ о сыновней Матери-Церкви преданности,/ сему же правилу следовати зовеши, отче,// Ангелов вдохновляяся образом.

Иже не имеет где главы подклонити,/ - се же о Господе видение ти истинное, Филосо́фе,/ – Той присно в пути сый,/ да человецы обрящет,// о назидании к Нему тщащияся.

К небеси возносима духом,/ от уз плоти яве свобождается душа/ - от земли сия зриши, Филосо́фе,/ - да и тайны отверзутся ти// жизни небесныя.

Аароново слово к Моисеевой ревности/ о законе духовне прилагаеши, Филосо́фе,/ да и па́ства твоя возревнует/ помыслов чистоте, чувств безстрастию,// бескорыстию деяний.

И стояние молитвенно без исправления жития,/ без усердия о служении Богу неленостнем,/ я́ко дым свещи вменяеши Филосо́фе,/ лицемерия о борителю,// богоносныя любве святоделателю.

Велия праздников святость/ о нашей исполняется ко святому житию ревности,/ я́ко и дни святыя - свидетельствуеши, отче,// - нас ради освятил есть Господь.

Богородичен: Икон ревнителю святых, нечестива царя обличителю,/ доблественну Андрею-мученику/ созидаеши благолепный, Филосо́фе, храм/ - о святей памяти чудоспасения семьи царския,// от чудотворна хранимыя образа Богородицы.

Седален:

Сеяти неленостне, Филосо́фе, зовеши,/ еже на нивах сердец человеческих/ доброе веры семя,/ аще по силе нашей подобно горушну малостию,/ обаче, орошаемо благода́тию Духа,// благий плод принесет в терпении.

Слава:

Да вложим рукою искусною/ Божия слова квас в души верных,/ - паки вещаеши, Филосо́фе,/ - о уповании несумненне,/ я́ко во время свое вскиснут вся,/ убо скорбьми испекшеся,/ сладким принесутся хлебом// во Царствии Божии.

И ныне: Праздника или Богородичен сей:

Во утробе Твоей, Богомати,/ Хлеб испечеся истинный,/ от Негоже ядше живи будем:/ Тем присно питаеми,// избавляемся Тобою от всякия нужды.

Песнь 4

Ирмос: Положи́л еси́ к нам тве́рдую любо́вь, Го́споди: / Единоро́днаго бо Твоего́ Сы́на / за ны на смерть дал еси́. / Те́мже Ти зове́м, благодаря́ще: / сла́ва си́ле Твое́й, Го́споди.

Таинственно Господь вселяется/ в совозвдвигнутый Им, Филосо́фе, и ревностию твоею храм,/ се – небесная врата отверсты, взываеши,/ небо низведеся: взыдите убо любовию, вернии,// до Престола Бога и Царя.

И мы убо с Соломоном и с тобою, отче, воззовем:/ услыши, Боже, Боже наш, -/ услыши всяку молитву,/ еюже помолится Ти всяк человек,/ иже бедствие и горе свое ощутит,/ и прострет руки своя ко храму святому Твоему:// услыши и помилуй, и прости.

Юношески сердцем восклицаеши,/ духом зрел сый измлада, святе:/ «Како не воззовем с Давидом, братие,/ о храме я́ко селении Господа сил:/ «Желает и скончавается душа моя, Спасе,// во дворы Твоя».

Созываеши, отче,/ вся в бурне мори житейстем плавающия,/ я́ко под кров ковчега, во святый храм,/ в немже тихое пристанище досязается// Царствия Божия!

От живыя воды слова Божия/ жажду утолим правды,/ паки и от Хлеба Жизни насытимся во храме святем,/ твоими, Филосо́фе, призываеми словесными образы,// паки и житием праведным.

Тро́ица Бог наш,/ милостию богат сый,/ вся во храме сущия зрит,/ - я́ко от небес вещаеши, отче,/ - на мольбы всех приклонено есть ухо Его,/ убо отверсты суть благое сердце// и щедрая десница Его.

Ангелом предстоящим незримо,/ небоподобно является Церкве нашея богослужение:/ се - отцев похвала// и твое, Филосо́фе, свидетельство.

Богородичен: Имже образом елень на водныя устремлен источники,/ сице души верных в храм Твой, Христе, устремляются,// под кров Пречистыя Ти Матери.

Песнь 5

Ирмос: К Тебе́ у́тренюю, всех Творцу́, / преиму́щему всяк ум ми́рови, / зане́ свет повеле́ния Твоя́, / в ни́хже наста́ви мя.

Ныне да не затворится слух наш/ к званию твоему, отче:/ соберитеся, люди русстии,/ в нерасторжимыя любовию соузы семейныя,// сохраните убо я в целости и чистоте.

Ныне да не оставят, по слову твоему святому, отче,/ родителие чад своих попечением/ о духовнем тех возрастании,/ еже да возвратится им оных почтением,// и тако враг да не приразится всем.

Истинным жития искусством возглашаеши, Филосо́фе,/ я́ко ничтоже мирское устрашит семью богобоязненну, чадолюбиву,// друг о друзе благопопечительну.

К па́стве ти возлюбленней, отче,/ паки и к нам есть огненно слово твое:/ "Аще убо хощете чад спасти и семью, с ними же и страну всю,/ именем Божиим да возрастятся юнии,/ под лучами веры,// Материю-Церковию руководимии.

Аще сия восхощете истинно,/ паки благовещаеши, Филосо́фе,/ возведите убо чад к совершенству христианскому,/ - сей же первый вам есть// родительский долг.

Исповедаеши, Филосо́фе,/ я́ко высшее упование детоводителем,/ суть словеса Спасовы:/ "Будите убо вы совершени,// я́ко Отец ваш Небесный совершен есть".

О дражайшая, восклицаеши, отче, неизгладимая память детства,/ осененна благотворным, живительным образом// матере боголюбивыя и христианина-отца!

Богородичен: Ангелы хранимии,/ имя всесвятое Спасово и Пречистыя,/ отцы и матери во устах да хранят и сердцах,// - се же чадом их неценимое приобретение.

Песнь 6

Ирмос: Бе́здна после́дняя грехо́в обы́де мя, / и исчеза́ет дух мой; / но простры́й, Влады́ко, высо́кую Твою́ мы́шцу, / я́ко Петра́, мя, Упра́вителю, спаси́.

Несть радования нечестивым,/ по Писанию и согласну с оным твоему, Филосо́фе, слову,/ я́ко и высокоблагое веры чувство// тем неведомо есть.

Несть уныния верному,/ паки вещаеши, отче,/ аще бо и низпадет от пути истинна,/ се - руку помощи от небес обрящет/ и утешение в скорбех,// узрит мысленным взором тайну грядущаго.

Оглашаеши концы похвалою веры, о Филосо́фе,/ яже вселенную утверди,/ яже народом просвещение подает истинно,// я́ко от Христа и Господа зачало прият.

Верою утверждаемым,/ ободряеши, отче, дух нам,/ да никоимже преткновением стопы наша запнутся,/ о устремлении к богодаруемой свободе,/ досязании лепоты истинныя,/ возсозидании Святыя Руси.

Адама́нты веры святыя блистанием,/ я́ко под лучами живительными,/ зри́ши, Филосо́фе, открове́ны цве́ты //добродетелей души́ ру́сския.

Филосо́фу Спаса вопрошающу/ о Святыя Руси грядущих,/ кое ныне слово, я́ко мученик, слышит,/ аще не: прииди́, благослове́нне Отца Моего,// о небесных ликуй, и о земных молися.

И к нам зов твой, отче святый,/ я́ко да и наша воспламенятся сердца/ любовию к заблудшим,/ да огласятся богоневедущии словом истины,// и правды Евангелие да открыется им.

Богородичен: Любочестне, Филосо́фе,/ славиши веру Христову,/ яже молитвами Богородицы и всех святых/ во едино собирает овцы словесныя// и сохранно держит их во ограде Церкве.

Кондак, глас

Филосо́фе, проповедниче велегласнейше,/ Филосо́фе, щедродателю крайнейше,/ Филосо́фе, страдальче изряднейше:/ воздохни о нас, Филосо́фе,// мучеников похвала.

Икос:

Я́ко светоча добросиятельна познахом тя, отче,/ я́ко милостива тя па́стыря благодарим,/ о страдании твоем ужасаемся/ и трепетом величаем тя:/ воздохни убо о нас, Филосо́фе,// мучеников похвала.

Песнь 7

Ирмос: Я́коже дре́вле благочести́выя три о́троки / ороси́л еси́ в пла́мени халде́йстем, / све́тлым Божества́ огне́м и нас озари́, / благослове́н еси́, взыва́ющия, / Бо́же оте́ц на́ших.

Оглашается мир словом крестным Филосо́фа,/ агнца и па́стыря,/ благословен еси, взывающа,// Боже отец наших.

Се же зриши, Филосо́фе, Крест Христов/ я́ко велие охранение,/ бедствующим дарованное// и без труда немощным.

Опытне богословиши, Филосо́фе, о Кресте/ я́ко средоточии земныя жизни Христовы,/ яже крестом Спасу зачатся -// Крестом убо и конец прият.

Филосо́фию Креста житием познаеши, отче,/ и паки свидетельствуеши,/ я́ко Той есть присный спутник// всяка истинно верующа.

Архангельской гласящей трубе,/ прежде страшнаго Царя Славы пришествия,/ предвзыдет Честный Крест,/ - яснозриши, Филосо́фе, сия и являеши, - / сего бо ради и Церковь предносит той,// я́ко Владыки скипетр.

Подвигоположник нам есть Христос Господь,/ сего ради и христианин всяк/ крестоносец есть безропотен./ Се же слова, жития// и смерти твоея свидетельство, Филосо́фе.

Ожесточение мира зриши, Филосо́фе,/ среде мнимыя тишины времене,/ я́ко о ненавистнем миру и христианом дражайшем/ брань невидима совершается присно./ Вся убо сия ради языков Чаяния/ и Света очесем нашим// Иисуса Господа.

И ныне:

Богородичен: Юже неложно именуем Агницу,/ Ейже я́ко Царице присно кланяемся,/ Сию Богородицу исповедуем/ и приводим Ти, Спасе,// я́ко Матерь в молитву.

Песнь 8

Ирмос: Нестерпи́мому огню́ соедини́вшеся, / Богоче́стия предстоя́ще, ю́ноши, / пла́менем же неврежде́ни, Боже́ственную песнь поя́ху: / благослови́те, вся дела́ Госпо́дня, Го́спода / и превозноси́те во вся ве́ки.

Слово оскудевает, смущается дух,/ како описати достойно есть/ подвиг страдания Филосо́фа отца,// паки и сынов ему верных?

Велие бяше лютое,/ егда слова Божия вития умолча,/ егда обнища конечне богатяй многия,// - ужаснися, небо, и возстени, земле.

Я́ко изволися Господу, тако и бысть,/ зовет со Иовом Филосо́ф,/ се - недоведомое,/ чада предаяй отец// любовию на смерть.

Щедродатель сый,/ како не предаст дражайших живо́т// Вседражайшему и Живо́та Подателю?

Святии священномученицы Филосо́фе, Николае и Бори́се, молите Бога о нас:

Едини о послушании да яви́мся,/ я́ко чада твоя, отче земный,/ едини да обрящемся твоею молитвою// пред Отцем Небесным.

Ныне с миром рабы Твоя,/ отпусти, Владыко,/ и мене не лиши// сладка Твоего и тех зрения.

Ны́не а́нгели и сы́нове тя сретают, великомучениче,/ нам же зде -// благое молчание.

Оружие душу Ти пройде, Чистая,/ егда Сын Твой от земных отпустися// я́ко Раб Владыки Истиннейший.

Песнь 9

Ирмос: Но́вое чу́до и Боголе́пное: / деви́ческую бо дверь затворе́нную / я́ве прохо́дит Госпо́дь, / наг во вхо́де, / и плотоно́сец яви́ся во исхо́де Бог, / и пребыва́ет Дверь затворе́на; / Сию́ неизрече́нно / я́ко Богома́терь велича́ем.

Мира не остави,/ град твой и люди посети, Филосо́фе,/ обычною ти, святе, милостию,/ я́ко в мире пострадав Христове,// уснул еси.

Ученик сый благода́тен/ велия во благода́ти Иоа́нна-отца,/ нас во благом утверди ученичестве, Филосо́фе,/ да по образу твоему// в милосердие души своя погрузим.

Чада своя, Филосо́фе,/ манною воспитав слова Божия,/ мира суеты отвратил еси,/ и нас миролюбных страстей свободи:/ вся бо возможна твоему ходатайству,// славне мучениче Христов.

Еже о богопреданнем сердце/ песнь великую воспел еси,/ Бога чистым ти зриши сердцем,/ любовию, я́ко соузом совершенства наслаждаяся присно!/ Ныне посети наша немощи, отче,// тоюжде любовию снисходя сердечною.

Нелицемерною любовию,/ по слову твоему и молитвам, отче,/ да образуем сердце,/ егоже чистотою да сохраним,// во еже любити вышняя вся.

И слову твоему послушнии,/ и нраву по силе причастники покажи ны, отче,/ во еже вся оставити скоропреходящая,/ ради бисера едина Царствия Божия// и правды Его.

Кровию Агнчею убелившии ризы своя, о мученицы,/ станите пред Престолом Его я́ко стеною,/ и крамолы и раздоры утолите от земли Русския -/ паки молит Филосо́ф святыя,// имже и причастник явися во святем дерзновении.

Богородичен: Аннино Прозябение да воспоим, мучениколюбцы, Пречистое -/ Ааронову дщерь и Давида внуку-/спострадати могущу немощем нашим,/ недугов Целительницу и Утешение в скорбех,// Марию Богоневестную.

Светилен:

Светосиятельна всем твоя есть, Филосо́фе, святость:/ утешением согревающи, души врачует и телеса,/ освящающи вся// любовию к тебе прибегающия.

Слава и ныне:

Светосияет Тобою, Богородице, Божественный Свет -/ Спас и Живо́т наш Иисус-Господь,/ вся освящая мучениколюбцы,// любовию к Тебе прибегающия.

На хвалитех стихиры Праздника (аще есть) и сия 3, глас 5, подобен «Радуйся»:

Радуйся, Филосо́фе, во ученичестве молчаливейший,/ собираяй от юности таланты духовныя,/ да явишися, мудре, в зрелости/ я́ко глашатай немолчный заповеди,/ о еже день святити Господень,/ о еже любити благолепоту храмов Божиих,/ в нихже приобщался еси велией Жертве,/ ревностию о Той подражая праведну учителю и отцу.

Радуйся, Филосо́фе, церковный светочу,/ Богоразумием осияваяй концы,/ тайнозрением уподобивыйся Богослову-апостолу,/ трепетный о созерцателю судеб Божиих,/ снизходяй, незлобиве, к немощию долу поверженным,/ досязаяй погрязшия во тьме богоневедения,/ о любви изрядным подражанием // Святому ти учителю Иоа́нну-отцу.

Не постыдишася о тебе, Филосо́фе страдальче,/ терпящии о лихолетии Господа сил,/ не посрамишася Того ищущия,/ среде самоизмышленныя лютыми пагубы,/ но ти стратигу новомученик полка́ / исповеданием чистым следуют,/ е́же принесл еси Спасу предстоянием:// се же, Господи, аз и дети мои.

Слава, глас 6:

Сострадательныя дети/ и о Господе сосвидетели,/ с собою, Филосо́фе отче, привлекл еси:/ и ваш подвиг ныне воспевших,/ ко спасения тесным стезям/ несравнимым жития и смерти образом// и молитвами привлецыте.

И ныне:

Праздника или Богородичен сей:

Егда славнии новомученицы воздохнут о нас Богородице,/ уповаем Тою спасение улучити/ и возопити Благословенней:// Яже о всех благая Мати, слава Тебе.